مطلوب كل اللى حايب اكتر من 95 فى الثانوية

[Elmobd3]

السلام عليكم يا شباب

معاكم اخوكم كريم جبت فى تانية 92.5 :( و ده بسبب الالمانى جايب فيه 42.5 :(

عموما قدر الله ما شاء فعل

انا كده ورايا مسؤلية كبيره فى تالتة و شغل جامد علشان اجيب مجموع حلو

انا بس كنت عايز اسأل اخواتى اللى جابوا مجاميع عالية ازاى ؟

متستغربوش من السؤال و لكن فعلا ازاى لان المجموع مش مذاكرة بس !

يعنى علاقتك حلوه مع ربنا مطيع للوالدين كده يعنى ؟

[{ زائــــــــــــــــــر }]

المجموع مذاكرة وبس انا دفعة 2004 جبت97.5% مجموع نهائي ودخلت طب كنت جايبة في تانية94% بس في تالتة جبت 98% عايزة اقولك ان المجموع مذاكرة ومذكرة ثم مذاكرة وبس انا بقى كانت علاقتي مع الوالدين زي الزفت ومع ربنا ماكنتش اوي يعني كل اللي عملته دحيت ليل نهار وحليت النماذج وامتحانات السنين اللي فاتت ذاكرت وبس غير كده كنت ضايعةةةةةةةةةةةةةةة في كل حاجة تانية في الحياة بجد ما بتفرقش

[{ زائــــــــــــــــــر }]

علي فكرة الموضوع علي قد ماهو مذاكرة هو كمان بيبقي حظوظ واعتقد ان موضوع الحظوظ ده اكتر كمان من المذاكرة انا الحمد لله جبت 96.8 ف تانية ثانوي وعلي قد ان مجموعي كويس بس انا نازلة جامد ف الكيمياء يعني 47 دي قهرتني جامد اوىىىىى لاني كنت بجد دحة نفسي جامد اوىىىى فيها وكمان راجعت مع الاستاذ وكنت متوقعة وهو قالي درجة او نص درجة بالكتيييير بس الحمد لله وانت يا مبدع احمد ربنا انا ليا صحاب نزلوا للتمنينات مع انهم كانوا دحيحة وبيذاكروا جامد جدااااا :?
بس هنعمل ايه حظووووووووووووظ :(

[Milana]

على فكرة يا جماعة ما فيش حاجة اسمها حظوظ وكمان
ما فيش حاجة اسمها دح ده كله ملهوش اى لازمة بجانب
علاقتك بربك و بوالديك

فأنا كانت مذاكرتى قليلة و لكنى جبت مجموع عالى والحمد لله
هذا كان من فضل ربى عليا
واما من قالت ان علاقتها بالله و بوالديها كانت وحشة ومع ذلك
جابت مجموع كويس
فهذا لأن الله كبير لا يضيع اجر من احسن عملا
ولكلا رأيه

[{ زائــــــــــــــــــر }]

طيب انا جايبه 94.15% وان شاء الله حروح اعمل تظلم فى الالمانى والعربى يارب اخد ولو حتى درجه وعيبى انى من اول السنه بزاكر بس فى الاخر مش زاكرت كويس ولعبت كتير والتركيز قل ووقعت فى حاجات تافهه اوى فى الامتحانات بس لمت درجات جامد غير ان فى تانيه كنت واخده احياء وتقريبا كل المواد كانت محتاجه حفظ وبس وخاصة الاحياء وانا مليش فى الصم اوى وخايفه اكمل علمى علوم ومش اجيب مجموع

[the blue sky]

انا جبت99% تالته ثانوي و الثانويه العامه مذاكره وبس +++ توفيق من عند الله
عامه اعمل الي عليك الاول و بعدين ربنا هيكرمك علي قدر ما ذكرت وهاديلك مثال بسيط حصل معايا السنه دي انا كنت مذاكر الاحياء من اول السنه كويس جدا وبعدين كان قدامنا يوم ونص بس بس عشان تراجع 11 فصل ورسومات انا سهرت ليله الامتحان لغايه ما خلصت مذاكره و نمت ساعتين بس دخلت مش شايف قدامي و حليت حل مش حلو وكان المفروض اجيب 48.5 لكن ربنا عارف الواحد كان بيذاكر السنه ديا اكتر من 10 ساعات في اليوم فكرمني علي قد ما ذاكرت وجبت 50
فاهم حاجه اعمل الي عليك الاول و بعدين ربنا هيكرمك علي قدر ما ذكرت :D

[Eng.Jessy]

بص الموضوع مش مذاكرة وحفظ كده وخلاص المفروض يكون فيه فهم وتركيز
والفهم والتركيز دول اهم حاجة اهم من الدح نفسه
والله انا اعرف ناس كانوا مش بيقوموا من على الكتاب وطول اليوم حفظ حفظ وفى الاخر جابت 90؟؟؟؟؟؟؟
ده لان مفيش فهم ولا تركيز
وعلاقتك بربنا وبأهلك مهمة جدااااااااااااااا
لان لو علاقتك وحشة مع ربنا ومع اهلك انت نفسك مش هتكون مرتاح ونفسيتك هتبقى زفت خالص ومش هتعرف تركز فى مذاكرتك
ان شاء الله تقدر تجيب مجموع كبير السنه الجاية وخلى علاقتك بربنا وبأهلك كويسة

[Youri]

بالظبط يا جيسي

كل ما تفهم أكثر كل ما يكون أدائك أعلى وتحغظ كم اأقل

انت داخل على تالتة هتشيل هم العربي والأدب الطويل

وهتشيل هم الفيزياء

وهتشيل هم الرياضة أو الأحياء

لازم تنجز ومتنامش على المادة عشان تنجز

وعشان تنفع في كلية

لأن كل حفيظة ثانوية عامة بايتين في أولى طب وإعدادي صيدلة مبيتحركوش منها

تحياتي

[TariQ]

الموضوع اولا و اخير علاقتك بربنا ، بلاضافه الى توفيق ربـــــــــــنا ، على فكره انا جايب 95.12% ،والحمدلله رب العالمين

[{ زائــــــــــــــــــر }]

السلام عليكم عشان تجيب مجموع عالى اولا علاقتك بربنا :roll: ثانيا علاقتك بابا وماما و اضمن انك كويس مع الحاجات دى هتلاقى نفسك بتذاكر لوحدك اساسا وان شاء الله هتنجح بتفوق ومتنساش القران وذكر الله ودعاء ما قبل المذاكره وما بعد المذاكره 8O

[Dr/charme]

السلام عليكم
انا جبت في ثانوي السنادي 99% وكنت جايبة في ثانية 98.3%
وكل دة عشان توفيق ربنا
انا كنت براعي ربي في كل تصرفاتي بس اكيد كان في بعض الوقت اللي كنت برفة فية عن نفسي ولكن في حدود الصح فقط
بس اولا واخيرا ارضاء ربي ثم والديا ثم المذاكرة ولكن المذاكرة بضمير وفهم وليس لمجرد اخلص الدرس الفلاني
ومع العلم اني كنت جالسة مع جدي طوال السنتين لظروف اقامة والديا في الخارج
ولكن كنت براعي ربنا في مذكرتي وعارفة ان ربنا لا يضيع اجر من احسن عملا
وامي خلتني مؤمنة بمقولة
"المشوار مهما كان طويل بيبتدي بخطوة اعمل اللي عليك بامانة وربنا معاك"

وربنا مع الجميع
واذا انت كنت بذلت مجهود ربنا مش هيضيعة بس انت اؤمن بذلك...........

[مودى]

انا عايز اعرف ترتيبى علمى علوم 1325342 :P

[{ زائــــــــــــــــــر }]

واللهي العظيم الثانوية العامة مذاكرة وبس وطب كمان بلا علاقة بلا صداقة سيبك من اي حاجة تانية ده كلام شوية عيال معدومة الخبرة انا اكبر منكو ب 4 سنين ورايحة رابعة طب يعني محدش يكلم زي نا قولت دح وبس

[Fear_Allah]

السلام عليكم
أنل رأيى ان كله مترتب على بعض.يعنى ايه؟طبعا اولا لازم تظبط علاقتك مع ربنا وكمان تظبط نيتك وتسأل نفسك هو أنا بذاكر ليه؟ مش بس عشان أخش كلية حلوة وخلاص.لا قول انا بذاكر أولا عشان أرضيك يا رب ولأن طلب العلم فريضة وكمان عشان أبقى انسان مسلم محترم متفوق ومثل وقدوة لغيرى.كده انت كل خطوة وكل صفحة هتقرأها وانت بتذاكر هتاخد عليها ثواب وكمان هتحس انك ليك ذات.وطبعا الانسان اللى يعمل كده مستحيل تكون علاقته مع والده ووالدته وحشة لانه على يقين ان ده حرام.وابعد نفسك عن اى أصحاب مضيعين للوقت لان أقسم بالله الصحبة مهمة جدا ممكن ينزلوك الارض او يشدوك لفوق.دور على أفضل طلاب فى المدرسة وصاحبهم ومتقولش دول خنقة لانك لو قربت منهم هتلاقيهم زى أى حد بس ممكن يكونوا جد شوية وده مطلوب.وابعد كمان عن أى شئ يغضب ربنا على قدر الامكان وادعى كتير.كده تقريبا تكون هيأت جو نفسى جميل -وهو طبعا مهم جدا-وتقدر انك تذاكر بهدوء وبدون شد ان شاء الله واعمل جدول قوى واضغط على نفسك من أول السنة ومتكتفيش بالدرس وبس.وكن على يقين دائم بان الله مش هيضيع أجرك وربنا الموفق.

[waleed abdallah]

أنا مدرس فيزياء
وحصلت على لقب المعلم المثالي على مستوى الجمهورية
وبقول للجميع .. المجموع = قوة الإيمان بالله + المذكرة الجامدة جداً + موهبة الذكاء + سهولة الإمتحان
كل منها بنسبته
1- لو أن الله لا يريد لك كلية معينة ، هل يمكن أن تدخلها .. كلا ، فبعض الطلاب يمرضون في الامتحان وطول السنة بيذاكروا جامد جداً
2- المذاكرة الجامدة جداً : فإن الله لا يضيع أجر من أحسن عملا ،
ولاحظ : لا يرد القدر إلا بالدعاء
3- الذكاء : فأنا مدرسص أشرح نفس الدرس وبعض الطلاب يكون فهمه عال جداً ، وبعضهم لا يفهم ولا حتى بعد المرة الرابعة ولو فهم ، يكونه فهمه محدود .
4- سهولة الإمتحان : فامتحان سهل قد لا يميز بين المميزين والمتوسطين والكل يحصل على درجات مرتفعة
5- كثرة الغش 6- سوء التصحيح 7- ...... الخ مما تعلمونه فبعض الطلاب قد يحصل على درجات أعلى من المتوقع أو يظلم في درجات يستحقها وليس الجميع يراجعون . :arrow:

[waleed abdallah]

لكل من يريد أن يبدأ فيزياء على هذا المنتدى .. اليكم من يوم 1-8-2007 ولمدة 10 شهور
1- الشرح : ويضم كل صغيرة وكبيرة .
2- التلخيص : ويضم أهم النقاط في الدرس
3- المفكرة : وتضم تجميعاً للتعريفات - التعليلات - المقارنات - ........... الخ .
4- التقويم الشامل : -
أ- أسئلة الواجب المنزلي .. لكل حصة درس على حده
ب- أسئلة الكتاب المدرسي
ج- أسئلة دليل التقويم
د- أسئلة امتحانات سابقة .
ه- التقويم الشامل .. ويضم كل الأسئلة بدون تكرار ولكن كمية كبيرة جداً من الأسئلة .
ز- اختبارات متدرجة على الفصل .. ثم على الفصل والفصول السابقة .